【Emily】狗狗巨龜出馬 為大埔人打氣
【明報專訊】有團體上周六（11日）喺大埔林村公立黃福鑾紀念學校舉辦「寵愛社區，從心微笑」活動，話想借助寵物大使，幫助近期受情緒困擾嘅大埔區居民減壓。大會喺唔同課室安排參與者跟唔同動物互動，有狗狗（圖）、巨龜、爬蟲類如大蛇等，有參加者起初都有啲驚，但好快就伸出友誼之手觸摸動物，仲開心合照。活動由香港壽臣山獅子會慈善基金主辦，大會主席何曉瑩話活動有逾500名區內居民參與，冀透過人寵共融及災後心理支援等多個範疇活動，為大埔居民打打氣。