【Emily】國際試食節會展開鑼 有得食有得玩
【明報專訊】一連5日嘅「香港國際試食節暨優質食品博覽」噚日起喺灣仔會展開鑼，主辦方話今年主題係「預先試食、安心選購」，近500個攤位賣清真食品、零食、有機食品、各式茶飲等。除咗試食同入貨，場內仲有嘢玩，例如「長洲美食文化區」有個3.5米高嘅小型充氣包山畀市民「打卡」，亦有來自長洲嘅平安包同大魚蛋賣；懷舊區就可以畀5毫子，試試一手可以盡拎幾多糖果零食，每日名額50個。博覽每日開朝10晚8，最後一日傍晚6點結束，入場費10元，65歲或以上、持傷殘證或身高1米以下小童免費。