【Emily】議員last day有無愧有遺憾 田北辰交「最後功課」 陸頌雄願「海闊天空」
【明報專訊】今屆立法會任期噚日結束,超過三分之一現屆議員未連任,唔少人噚日喺facebook發表感言。實政圓桌田北辰話,13年議會生涯雖然做唔到每件事盡善盡美,但自問有落足120分力,噚日任期最後一日繼續開工,見證元朗青山公路-元朗段同鳳翔路交界嘅行人天橋升降機啟用。佢話係兌現番爭取設施2025年內啟用嘅承諾,形容算係交埋最後一份功課,可以帶住「無愧」兩字離開。