【Emily】田二少提政改 冀下屆立選實現333 話曾向中央倡議 盼容納小黨其他板塊
【明報專訊】實政圓桌議員田北辰成功將新界西北議席「交棒」莊豪鋒（Mark），兩人噚日見傳媒，話該黨以敢言、勤力拉票等制勝。田二少提及2021年向中央建議過「333」選制（直選、功能界別、選委會界別各30席），即直選每區3席，否則得20席容易畀大黨壟斷，市民覺得無得揀就唔投票，希望下屆選舉「333」成真，容納更多小政黨同其他板塊。被問當選後會唔會跟進政改，Mark話𠵱家係「拋磚引玉」，希望認同嘅議員集思廣益。